फेकोफनको धर्नामा प्रहरी हस्तक्षेप, १५ जना पक्राउ

सरकारले ल्याउन लागेको संघीय वन नियमावली तथा संरक्षण क्षेत्र विस्तार, प्रदेश वन ऐन संसोधनका विरुद्धमा चरणबद्ध आन्दोलन गरिरहेको सामुदायिक वन उपभोक्ता महासंघको आन्दोलन माथि प्रहरीले हस्तक्षेप गरेको छ । 

वन तथा भू संरक्षण विभागमा धर्ना दिन बसेका महासंघका पदाधिकारी माथि प्रहरीले आज विहान वल प्रयोग गरेर धर्नामा बसेका महासंघका पदाधिकारी सहित १५ जनालाई पक्राउ गरेको छ । 

प्रहरीले सामुदायिक वन उपभोक्ता महासंघकी अध्यक्ष भारती पाठक, महासचिव विर्खबहादुर शाही, सचिव ठाकुर भण्डारी , कोषाध्यक्ष पार्वता गौतम, डोलकुमारी सापकोटा, सहदेव न्यौपाने लगायतलाई पक्राउ गरेको हो । 
प्रक्राउ परेकाहरुलाई महेन्द्र पुलिस क्लवमा राखिएको छ । 

महासंघकी अध्यक्ष भारती पाठकले आफूहरुको शान्तिपूर्ण आन्दोलन माथि सरकारले दमन गरेको बताइन । 

सरकारी दमनका विरुद्ध देशभर थप शसक्त आन्दोलन चर्काउने पाठकको चेतावनी छ । 

महासंघले जिल्ला, प्रदेशदेखि केन्द्रसम्म १५ दिनदेखि विभिन्न विरोधका कार्यक्रम गर्दै आइरहेको छ ।